Sanoatni rivojlantirish jamg‘armasi

O‘zbekiston Respublikasi Prezidentining 2023-yil 21-iyuldagi PF-111-son Farmoni bilan sanoat tarmoqlarini tubdan rivojlantirish maqsadida O‘zbekiston Respublikasi Tiklanish va taraqqiyot jamg‘armasi huzurida Sanoatni rivojlantirish jamg‘armasi tashkil etilgan.

O‘zbekiston Respublikasi Prezidentining 2023-yil 18-dekabrdagi PQ-397-son Qarori bilan Jamg‘armaning asosiy vazifalari va uni moliyalashtirish manbalari hamda mablag‘lardan foydalanishning asosiy yo‘nalishlari belgilangan.

O‘zbekiston Respublikasi Vazirlar Mahkamasining 2024-yil 10-yanvardagi 18-son qarori bilan tasdiqlangan Nizomga asosan loyihaning texnik-iqtisodiy asoslari tegishli tarmoqning ilmiy-texnik kengashi tomonidan va loyiha doirasidagi import shartnomalari «Loyihalarni va import kontraktlarini kompleks ekspertiza qilish markazi» DUK tomonidan ekspertizadan o‘tkazilishi belgilangan.

Jamg‘arma mablag‘laridan foydalanishning asosiy yo‘nalishlari:

Metallurgiya, mashinasozlik, avtomobilsozlik, elektrotexnika, kimyo, farmatsevtika, to‘qimachilik (ip yigiruv va paxtani qayta ishlashdan tashqari), ipakchilik, charm-poyabzal (terini qayta ishlashdan tashqari), zargarlik, oziq- ovqat sohasidagi biotexnologiyalar va tibbiy ovqatlanish, zamonaviy qurilish materiallari ishlab chiqarish tarmoqlari va boshqa sanoat sohalari.

Jamg‘armaning moliyalashtirish shartlari:

1. Kreditlar: Yangi turdagi mahsulotlar ishlab chiqarish va mavjud quvvatlarni kengaytirishga qaratilgan sanoat loyihalari uchun import qilinadigan asbob-uskuna xarid qilish, shu jumladan avans to‘lovlarini qoplab berish maqsadida, xorijiy valyutada yillik 5% va milliy valyutada yillik 10% stavkada 10-yil muddatgacha, shundan 3-yilgacha imtiyozli davr bilan kredit mablag‘lari ajratiladi.
2. Sanoat ipotekasi: Ishlab chiqarishni tashkil etish maqsadida bino-inshootlar xarid qilish uchun 7-yil muddatgacha, shundan 2-yilgacha imtiyozli davr bilan milliy valyutada yillik 10% stavkada sanoat ipotekasi tizimi asosida kreditlar.
3. Aylanma mablag‘lar: Sanoat korxonalariga xomashyo materiallarini xarid qilish uchun aylanma mablag‘larni shakllantirish maqsadida 1-yil muddatgacha xorijiy valyutada yillik 4% hamda milliy valyutada yillik 10% stavkada kredit yoki subordinar qarz mablag‘lari ajratiladi.